Equipa Centru Saúde Comunitária (CSC) Nivel 2 Lospalos halao teste Massal Serologia ba moras hadaet.
Lospalos, 29 de setembro de 2025– Equipa Teste Massal Serelogia ba moras hadaet husi Centru Saúde Comunitária (CSC) Nivel 2 Lospalos halao teste masal ba 120Ano sira iha aula ESTV Nu. 1 de Lospalos.
Antes halao teste massal ida ne’e equipa saude halao uluk sosializasaun konaba moras hadaet mak hanesan Human Immunodeficiency Virus (HIV) Acquired Immunodeficiensy Syndrome(AIDS), sifilis no hepatitis B.
Ba Jornal Parede ESTV Nu. 1 de Lospalos Dra Shanty haktuir katak atu detekta moras hadaet iha municipio Lautem espesialmente ba Escola Técnica Vocacional Nu. 1 de Lospalos equipa CSC Nivel 2 Lospalos halao teste massal serologia ba moras hadaet.
’’Iha teste ran massal serologia ba moras hadaet ida ne’e wainhira detekta estudante ruma hetan moras hadaet entaun doutor sira sei halo akompanhamentu no tratamentu espesial ba ninia moras refere maibe moras refere hanesan moras ida nebe relasiona ho ema nia privasidade ka segredu tamba moras ne’e presiza halo tratamentu especial,tenik doutora”.
Moras hadaet tolu mak hanesan HIV AIDS, Sifilis no hepatitis B, bele hadaet liu husi ema ida ba ema seluk.
“Moras hadaet tolu ne’e bele hadaet liu husi relasaun seksual wainhira parseiru ida hetan tiha ona positivu ba moras hadaet sira ne’e, bele mos liu husi transfusaun ran ka donor darah wainhira ema nebe fo ran ne’e positivu moras hadaet, no mos moras tolu ne’e bele hadaet liu husi inan ba oan wainhira inan ne’e positivu moras hadaet tolu ne’e, esplika Shanty”.
Doutora ne’e mos hatutan wainhira iha familia ka kaben nain ruma iha komunidade nia laran mak hetan moras ida entre moras hadaet tolu ne’e ho positivu por ezemplo detekta ona katak laen hetan positivu moras hadaet entaun ninia parseiru mos tenque tuir teste ran atu nune’e ita bele detekta moras hadaet ne’e.
“Wainhira detekta ona moras hadaet ruma husi moras hadaet tolu ne’e entaun doutor sira sei halo akompanhamentu no fo aimoruk ka sona maibe ida ne’e konfidensial ka segredu, dehan Shanty.’’
Iha fatin hanesan Diretor ESTV Nu.1 de Lospalos José dos Santos hateten ba Jornal parede dijital ESTV Nu.1 de Lospalos katak sosializasaun no teste ran massal serologia ne’e importante.
“Tamba liu husi sosializasaun estudante sira bele rona informasaun kona ba saida mak moras hadaet tolu ne’e no mos liu husi teste ran serologia doutor sira bele detekta moras hadaet iha ita nia escola, hateten Diretor”.
Entretantu equipa Centru Saúde Comunitária (CSC) Nivel 2 Lospalos halao teste Massal Serologia ba moras hadaet iha ESTV Nu.1 de Lospalos informa katak laiha moras hadaet iha escola ne’e.
Hakerek Nain : Adão Branco
Editor : Redasaun ESTV Nu.1 de Lospalos
