Aluno Micson Jesus da Silva halao hela aprezentasaun ba Obra Instalasaun Sinu Dijital Automatiku.
Lospalos, 12 setembru 2025 -Estudante husi departamentu eletrisidade aprezenta Instalasaun Sinu Dijital Automatiku (Digital Bell Timer Switch Instalation) iha Ezame PAP ne’ebe halao iha Eskola Sekundariu Teknika Vokasional Numeru I Lospalos.
Iha aprezentasaun PAP (Prova Aptidão Professional) iha Eskola Sekundaria Teknika Vokasional Numeru I Lospalos durante minute hatnulu Resin Lima, estudante Micson Jesus da Silva hateten Sinu Dijital ne’e sei lian no mate ho automatiku.
‘’Objetivo ami foti topiku konaba Instalasaun Sinu Dijital Automatiku (Digital Bell Timer Switch Instalation) ida ne’e tamba ami hare sinu iha ita nia escola sei uza sinu nebe ita sei dere ka baku ho besi no iha mos sinu nebe usa ona eletriku maibe sei manual, Por ezemplo bainhira ita halao prosesu aprendizajen iha ita nia eskola ESTV Nu.1 de Lospalos professor piquete tenki dere sinu tuir horas nebe iha orario, maibe obra nebe ami apresenta ne’e automatiku tiha ona, Obra ne’e ita bele regula tuir ita nia hakarak,’’hateten Micson.
Iha apresentasaun iha juri sira nia oin aluno ne’e mos esplika kona ba oinsa maka uza obra ne’e no mos regula aparelu eletroniku ‘Digital Timer switch’ tuir ita nia hakarak.
“Aparelu eletroniku ‘Digital Timer Switch’ ita bele regula tuir oras no loron tuir ita nia hakarak. Por ezemplu ita hakarak ita nia sinu ne’e lian ho tempu sanolu resin lima segundus iha meiu dia tuku sanolu resin rua (12:00) Oras Timor Leste kada loron. Etaun ita bele regula tuir mai ne’e uluk nanain ita hamoris aparelu ne’e no tenki regula tuir ita nia horas Timor Leste hafoin ita bele hatama horas ba programa sinu moris/ON nian iha tuku 12:00 no programa sinu mate/OFF nian iha tuku 12:00,liu 15 segundus,tuir mai ita hatama programa semana/WEEK nian, ita hamoris too dominggo no ikus liu ita nia aparelu ne’e ita liga ba eletriku atu nune’e aparelu ne’e bele funsiona tuir ita nia hakarak,”dehan Micson
Estudante ne’e mos hateten obra Instalasaun Sinu Dijital Automatiku ne’e sira regula ona tuir orario aprendizajen Escola Secundaria Tecnica Vocasional Numeru I de Lospalos.
‘’Ami nia obra ne’e ami regula tuir orario aprendijajen Escola Sekundariu Tecnica Vocasional Numeru I de Lospalos, atu nune’e sinu bele lian no mate tuir orario escola ho automatiku, bainhira apresentasaun ida ne’e hotu ami bele monta iha ita nia escola rasik,”tenic Micson.
Entretantu Escola Secundario Tecnico Vocasional Numeru I de Lospalos tama aula iha 8:15 entaun sinu ne’e lian automatiku, sinu lian ho tempu sanolu resin lima segundus no mate rasik, sinu lian fali iha tuku 9:00 atu troka materia aprendizajen, sinu lian ho tempu sanolu segundus no mate fali, sinu lian fali iha tuku 9:45 atu troka materi aprendijajen, sinu lian ho tempu sanolu segundus no mate, sinu lian fali iha tuku 10:30 atu troka fali materi aprendizajen, sinu lian ho tempu sanolu segundus nia laran no mate. Sinu lian fali iha tuku 11:15 atu intervalo, sinu lian ho tempu sanolu resin lima segundus no mate. Sinu lian fali iha tuku 11:30 atu tama aula, sinu lian ho tempu sanolu resin lima segundus no mate, sinu lian fali atu troka materia iha tuku 12:15, sinu lian ho tempu sanolu segundus no mate. Sinu lian fali atu troka materia iha tuku 13:00, sinu lian ho tempu sanolu segundus no mate. Hafoin sinu sei lian fali iha tuku 13: 45 atu estudante no manorin sira termina prosesu aprendizajen. sinu bele lian no mate ho automatiku tuir tempu nebe regula tiha ona to’o loron sabado.
Micson mos hatutan sira nain nen mak hamutuk hodi foti titulu konaba Intalasaun Sinu Autumatiku, sira halibur osan atu kontribui ba obra ka instalasaun ida ne’e ho total orsamentu nebe sira gasta ba obra ida ne’e mak mais ou menus dolar Atus ida valunolu resin.
‘’Aparelu eletriku no eletroniku nebe ami uza ba instalasaun ida ne’e ami kompra iha Capital Dili no balun ami hameno liu husi loza. Komponentu nebe ami uza ba ami nia Instalasaun maka hanesan MCB(Miniature Circuit Breaker),Kontaktor, sinu eletriku, Pipa Ducting, Fiu no Digital Bell Timer Switch,’’dehan Micson.
Estudante Micson Jesus da Silva iha audencia no juri sira nia oin katak obra ne’e laos aplika deit ba sinu eskola nian maibe bele utiliza ba nesesidade sira seluk.
“Ami nia obra ne’e laos aplika deit ba sinu Eskola maibe bele uza ba nesesidade seluk mak hanesan bele liga ba Sanio ou DAP nebe supa be’e atu nune’e be’e bele mai automatiku tuir oras no loron nebe ita regula tiha ona. Bele mos utiliza ba lampu ka lampada iha ita nia uma atu lampu bele lakan no mate automatiku,”esplika Micson
Iha fatin hanesan professor orientador hateten ba jornal parede dijital ESTV Nu.1 de Lospalos katak iha era dijital ida ne’e estudante sira tenki kreativu no hanoin inovativu atu nune’e ita labele lakon ho ema seluk.
“Ita nia estudante nain ne’en husi departamentu eletrisidade nebe foti titulu PAP kona ba Instalasaun Sinu Dijital Automatiku, hau hanoin ida ne’e nudar obra inovativu. Tamba sinu eletriku nebe ita buti butaun ka interuptor mak bele lian sira bele halo sinu ida ne’e sai automatiku, no obra ne’e ita sei uza ba ita nia eskola ida ne’e,”dehan manorin ne’e.
Iha ezame ba obra ida ne’e juri nain tolu avalia katak Micson Jesus da Silva aprezenta ho diak entre alunos nain ne’en nebe halao apresentasaun PAP ho titulo Instalasaun Sinu dijital Automatiku(Digital Bell Timer Switch Instalation) ho valor Diak Liu.
Iha aprezentasaun ba obra ida ne’e partisipa mos inan no aman husi kada estudante Escola Sekundaria Teknika Vokasional Numeru I Lospalos.
Hakerek Nain : Adão Branco
Editor : Redasaun ESTV Nu.1 de Lospalos
