Professor no profesora hamutuk nain lima husi Escola Tecnica Vocasional Numeru I Lospalos tuir hela formasaun konaba Skills Training for Economic Participation iha INFORDEPE Balide – Dili.
Lospalos, 11 Setembru 2025 – Profesores husi Escola Tecnica Vocacional Numeru I Lospalos nain lima tuir formasaun Skills Training for Economic Participation (STEP) iha INFORDEPE Balide – Dili durante semana rua nia laran.
Hafoin fila husi Dili, ba Jornal Parede Dijital ESTV Nu. 1 de Lospalos, Sefi Ekipa Professores Nelinha de Jesus Marques informa katak formasaun durante semana rua nia laran iha INFORDEPE Balide – Dili konaba abilidade ba partisipasaun ekonomika ou Skills Training for Economic Participation (STEP).
“Objetivu husi formasaun ne’e maka atu kapasita no hasae ami nia konesimento konaba materia ekonomia no hatene konaba negosio no durante loron sanolu resin rua nia laran, hahu husi loron 25 Agusto to’o loron 9 Setembro 2025, ami aprende buat barak relasaun ho formasaun, hafoin ida ne’e ami sei transmiti fila fali konesimentu hirak ne’e ba alunus sira”, tenik Sefi Ekipa.
Sefi Ekipa ne’e hatutan formasaun STEP hanesan projeto pilotu, ne’ebe partisipa husi escola rua mak hanesan Escola Tecnica Vocasional Numeru I Lospalos no ESTV Palaban – RAEOA.
“Formasaun ne’e halao tamba ita nia Ministerio Edukasaun serbisu hamutuk ho INFORDEPE no Organizasaun Internasional UN Women”, dehan Nelinha.
Professores nain lima husi Escola Tecnica Vocacional Numeru I Lospalos maka hanesan Francisco Pereira nudar professor materia espesifiku Konstrusaun Sivil atual Sefi Departamentu Construsaun Sivil, Leopoldo Gustavo professor ba materia espesifiku Departamentu Mecanica Automovel atual Sefi Departamento Mecanica Automovel, Professora Celestina de Jesus nudar professora ba materia Hatene Kona Ba Negosio, Professora Maria Olga da Silva husi Departamentu Construsaun Sivil ne’ebe lori materia Lingua Melayu no Materia Espesifiku Konstrusaun Sivil no Professora Nelinha de Jesus Marques lori materia Lingua Tetum.
Entretanto konhesementu hirak ne’ebe profesores nain lima hetan durante loron sanulo resin rua nia laran konaba Skills Training for Economic Participation (STEP) sei kontinua transmite ba alunus sira iha eskola Tecnica Vocacional Numeru I Lospalos iha tempu oin mai.
Hakerek Nain : Adão Branco
Editor : Formador/ZPD-SECOMS
Parabéns ba Profesores ESTV 01 Lospalos. Susesu nafatin ba atividade tomak
Obrigado barak Maun! Bom Trabalho no Adeus